Leysan yağışları Qusarda fəsadlar törətdi

Region Tv-nin məlumatına görə Mayın 27-si axşam saatlarında Şimal regionuna  yağan güclü leysan yağışı çaylarda suyun səviyyəsinin artmasına, bəzi yerlərdə isə selə səbəb olub. Qusar rayonunun Əzizbəyov küçəsində də güclü sel sakinlərin həyətlərinə daxil olub.
Sakinlərin sözlərinə görə, evlərin həyətyanı sahələrinə daxil olan suyun səviyyəsi 1 metrə qədər çatıb və evlərin zirzəmiləri suyun altında qalıb. Sel suları iri daş parçalarını Əzizbəyov küçəsində yolun hərəkət hissəsinə gətirib. 

Əraziyə FHN-nin əməkdaşları gəlib, həyətlərdən su nasoslar vasitəsilə çəkilərək təmizlənib. Quba Regional Hidrometeorologiya Müəssisəsindən RTV-yə bildirilib ki, yağıntılı hava şəraiti bəzi ərazilərdə bu gün və sabah da davam edəcək. 

Müəssisədən o da bildirilib ki, Quba və Qusarın müxtəlif ərazilərinə 21 mm-dən 35 mm-dək yağıntı düşüb.

 Quruçay və Qudyalçayda suyun səviyyəsi 14 sm artıb.