QUSARDA DEBAT MƏRKƏZİ

Qusar rayonunda “Vətəndaş Cəmiyyətində Debat” İctimai Birliyinin regional mərkəzinin açılışı oldu.

Açılışda Milli Debat Proqramının koordinatoru Tural Abdullazadə çıxış edərək belə mərkəzlərin yaradılmasının gənclərin intellektual bacarığının, dünyagörüşünün artırılmasında, sərbəst düşünüb qərar vermək bacarığının inkişafında önəmli olduğunu qeyd etdi. O, mərkəzin regionun şimal bölgəsində açılmasının xüsusi önəmi olduğunu bildirdi. Bu münasibətlə “Vətəndaş Cəmiyyətində Debat” İctimai Birliyinin xüsusi diplomunu Qusar Gənclər və İdman İdarəsinə təqdim etdi. Qusar rayon Təhsil Şöbəsinin metodisti Qorxmaz Muradov bu mərkəzin Qusarda açılmasının rayonun gənclərinin intelektual səviyyəsinin yüksəlməsinə xeyli faydası olacağını bildirdi və birliyin kordinatoru Tural Abdullazadəyə təşəkkür və uğurlar arzuladı. Qeyd edək ki, ölkəmizdə regionlarda ümumilikdə 7 debat mərkəzi fəaliyyət göstərir. Debat mərkəzinin təlimçi müəllimi Malik Bağırovun dediyinə görə, 8-ci debat mərkəzi Qarabağ zonasında - Ağdamda fəaliyyət göstərəcək. “Vətəndaş Cəmiyyətində Debat” İctimai Birliyi öz fəaliyyətini Azərbaycanda 1998-ci ildən “Debat” təhsil proqramı kimi başlayıb. İctimai Birlik kimi 2001-ci ildə təsis edilib, 2005-ci ilin yanvar ayında Ədliyyə Nazirliyi tərəfindən qeydiyyata alınıb.  Mehman Fərmanov Qusar \ZAMAN AZƏRBAYCAN\